തെറിപ്പിക്കപെടുന്ന ബീജത്തില്‍ നിന്നും
സ്രഷ്ടി കര്‍മ്മം നടത്തുന്നവനെ
നിന്റെ ബലഹീനത സ്ത്രീയെ
പുറം തിരിപ്പിക്കുന്നതറിയാത്തതെന്ത് നീ?
കാഴ്ചയുടെ ഇട്ടാവട്ടത്തില്‍
കണിതിരയുന്ന കഴുകകണ്ണാല്‍
നാഴിക മുഴുവനും
തിരിച്ചറിയാത്തവണ്ണം സ്ത്രീ നിനക്കന്യയോ?
പത്താനക്കു തുല്യം കരുത്ത്
സിംഹാസനമോ അജയ്യം
ജയിച്ച പടയോട്ടങ്ങളില്‍ ദാസികള്‍ ഞങ്ങള്‍
എങ്കിലും ചോദിച്ചുപോകുന്നു
ആരുടെയൊക്കെയോ അമ്മയോ
അനിയത്തിയോ ഭാര്യയോ ഞങ്ങള്‍
ഞങ്ങളുടെ നിതംബത്തില്‍മുട്ടിനില്‍ക്കലോ
ഇടുപ്പില്‍ വിരലമര്‍ത്തലോ നിന്നിലെ രതി?
നിന്റെ യുദ്ധം ആണിന്റെ നേര്‍ക്കുനേരും
ഞങ്ങളോട് വീണുകിട്ടുന്ന ഇത്തിരിമറവിലും ആണോ?
മുന്നില്‍ വരുന്ന ഞങ്ങളെ
തുറിച്ചനോട്ടം കൊണ്ടോ
വിരലമര്‍ത്തല്‍കൊണ്ടോ നിങ്ങള്‍
മുഖത്ത് തുപ്പലേല്‍ക്കാതിരിക്കുക
ഞങ്ങളില്‍ വെറുപ്പിന്റെ വിഷം
നിറക്കുന്ന നിന്റെ ബലഹീനത
എന്റെ ഇണയോടുള്ള അമര്‍ഷവും
സമൂഹത്തോടുള്ളവെറുപ്പുമാക്കി മാറുന്നതറിയുക
ജാതികള്‍ക്കിടയില്‍ സ്ത്രീയും പുരുഷനും
രണ്ടു വര്‍ഗ്ഗം മാത്രം നിലനില്‍ക്കേ
പരസ്പരം മതില്‍കെട്ടുയര്‍ത്താതിരിക്കാം
നൈമിഷിക ചിന്തകള്‍ നിയന്ത്രിക്കാനാവാത്ത
നിന്റെ ചുമലിലോ ഞങ്ങള്‍ക്കാശ്രയം?
ഞാന്‍ അബല ,ഒറ്റബുദ്ധി,എങ്കിലും
നാല്‍ക്കവല്‍കളില്‍ , യാത്രകളില്‍
നിന്റെ സഹവര്‍ത്തിത്വം
എനിക്കപമാനമാവാതിരിക്കട്ടെ!
